आमा तिमी बिरामी
हुँदा पो म जन्मेको रहेछु ।
म गर्भमा रहँदा
तिमी बिरामी हुन थालेकी रे
म गर्भबाट प्रसून हुने प्रयास गर्दा
तिमी अस्पतालको बेडमा थियौ रे
म सुन्दर संसार चियाउन चाहन्थेँ
तिमीचाहिँ जीवन र मृत्युको दोसाँधमा
छट्पटिँदै थियौ रे ।
तिमी चिच्याउँदै थियौ रे
तिम्रा हातका मुठी कसिएका
आँखाबाट आँसु झरेका
गाला राता र पिरा भएका
घरि एक डल्लो बन्ने
र
घरि जिउ तन्काउने गर्दै थियौ रे
तिमी कहिले लामो सास फेथ्र्यौ रे
कहिले छिटो फेथ्र्यौ रे
तिमी त सास फेरेको थाहा नै नपाउने
बेहोस भएका थियौ रे
आमा तिमी बिरामी छँदा पो
म जन्मिएको रहेछु ।
साँच्चै आमा
आफू बिरामी भई
मलाई किन जन्म दिएको ?
बिरामी हुँदा पनि
के आशा लागेको ?
कतै तिम्रो वंशाणुगत गुण त
आज ममा सरेन
स्वच्छ मूलबाट स्वच्छ पानी निस्कन्छ
स्वस्थ मूलबाट स्वस्थ बिहानी निस्कन्छ
स्वस्थ र स्वच्छ रातबाट
स्वस्थ र स्वच्छ बिहानी हुन्छ
बिरामीबाट त बिरामी नै त जन्मन्छ
सायद म जन्मँदा तिमी
बिरामी भएर नै होला
म बिरामी भएको ।
हिजो मात्र मैले कागज हेरेँ
म जन्मँदाको
तिमी अस्पतालमा भर्ना भएको
प्रमाण पाएँ
हो,
त्यही प्रमाणले भन्छ, आमा
तिमी बिरामी थियौ
तिमीले मलाई जन्माउँदा
बिरामी भएकै कारण
म जस्तो बिरामी सन्तान जन्मायौ ।
तर खेद छैन
म निको हुने प्रयास गर्छु
म तिमीलाई स्वस्थ बनाउँछु
अनि मेरा सन्तानले जन्माउने सन्तान जन्मँदा
आमाहरु स्वस्थ हुने छन्
बच्चा पनि स्वस्थ जन्मने छन् ।
***
