काठमाडौं- साहित्यकार भुवनहरि सिग्देलको नवीनतम कृति ‘बहत्तर वसन्त’ बजारमा आएको छ।
भानु जयन्तीको अवसरमा वरिष्ठ साहित्यकार नारायण ढकाल, विश्लेषक शंकर तिवारी, गजलकार बाबु त्रिपाठी, आख्यानकार शैलेन्द्र अधिकारी, तर्कना शर्मा र रङ्गकर्मी/डिजाइनर प्रकेश सिन्धुलीयले सामूहिक रूपमा पुस्तकको लोकार्पण गरेका थिए। लोकापर्णपश्चात् विश्लेषक शंकर तिवारीले पुस्तकको पहिलो प्रति खरिद गरेर पुस्तक बजारमा पुगिसकेको जानकारी दिएका थिए।
गद्य र पद्य दुवै विधामा समानरूपले कलम चलाउन सक्ने सिग्देलको ‘बहत्तर वसन्त’ छत्तीसौं कृति हो। शास्त्रीय छन्दमा सहज, स्वच्छन्द र रसदार कविता लेख्नु उनको मौलिक क्षमता हो।
सिग्देलमा गुण र सौन्दर्य चेत, यथार्थपरक विषयको छनोट केन्द्रीय स्तरमा स्वच्छन्दतावादी भावधारा र मानवतावादी वैचारिकताको अभिव्यञ्जना गर्ने प्रवृत्ति पाइन्छ।
छन्द कवितामा सिग्देल सिद्धहस्त रहेकाले ‘बहत्तर वसन्त’ पुस्तक छन्द कविताप्रेमी, छन्द कविता सिकारु र छन्द साधकलाई अत्यन्तै उपयोगी रहने कुरा प्रकाशक पुष्पराज पौडेलले बताएका छन्।
शिखा बुक्सले प्रकाशन गरेको यस पुस्तकमा जम्मा ७२ वटा छन्द कविता समावेश छन् र यसको मूल्य २०१ तोकिएको छ।